Sistema Eragilea plataforma bat da, artistei beren argitalpenak deskribatzeko eta sarean katalogatzeko aukera ematen diena. Sistema Eragilearen datu-baseak erabiltzaileek sorturiko erregistroak biltzen ditu, eta beste funts bibliografiko batzuetan katalogaturik dauden argitalpen-erregistroak ere bereganatu nahi ditu.
2016ko udaren bukaeran, txango bat egin genuen Arraia-Maeztu asfalto-meategi zaharrera. Lantegiaren hondakinen azpian, argitalpen bitxi bat aurkitu genuen: Artxibo Teknikoen Zerbitzuak (S.A.T.) 1958. eta 1978. urteen artean Espainian argitaratu zuen Eraikuntzen eta Herri Lanen Katalogoa.
